Zamonaviy dunyoda xorijiy tilni o‘rganishning asosiy maqsadlaridan biri lingvomadaniy kompetensiyani shakllantirishdan iboratdir [2]. Lingvomadaniyat birliklari sifatida rang konseptlari til va madaniyat uyg‘unligini ta’minlovchi muhim vosita hisoblanadi [1]. Mazkur maqola nazariy xarakterga ega bo‘lib, unda rang konseptlarini o‘qitishda kognitiv, kommunikativ va qiyosiy-madaniy modellarning uyg‘unlashuviga asoslangan integrativ metodologiya tahlil qilinadi [3]. Maqolada reflektiv, tahliliy va kontekstga asoslangan ta’limni nazarda tutuvchi bosqichma-bosqich o‘qitish strategiyalarini rejalashtirish uchun konseptual asos taklif etiladi. Auditoriya sharoitida empirik tadqiqotlar o‘tkazilmaganiga qaramay, tadqiqot rang asosida o‘qitish jarayonini til, kognitiv va madaniyatlararo ko‘nikmalarni tizimli ravishda rivojlantirish nuqtayi nazaridan tushuntirib beruvchi keng nazariy asosni taqdim etadi [7]. Tadqiqot natijalari xorijiy tillarni o‘qitishda keyingi empirik izlanishlar va metodik ishlanmalarni yaratishda foydalanilishi mumkin.