MOBIL ILOVALAR YORDAMIDA XITOY TILINI MUSTAQIL O‘RGANISH STRATEGIYALARINI SHAKLLANTIRISH

Ushbu maqolada mobil ilovalar asosida xitoy tilini mustaqil o‘rganish jarayonining pedagogik, metodik, psixologik va lingvodidaktik jihatlari tizimli ravishda tahlil qilinadi. Tadqiqotning asosiy maqsadi – raqamli ta’lim muhitida talabalarning o‘z-o‘zini rivojlantirish, mustaqil ta’lim olish va reflektiv fikrlash kompetensiyalarini shakllantirish mexanizmlarini aniqlashdan iborat. Maqolada mobil ilovalarning didaktik imkoniyatlari, ularning interaktivlik darajasi, shaxsga yo‘naltirilgan ta’limni ta’minlashdagi o‘rni hamda individual o‘rganish sur’atlarini qo‘llab-quvvatlash xususiyatlari ilmiy asosda yoritiladi. Tadqiqot jarayonida eksperimental va nazariy metodlardan foydalanilib, mobil ilovalarning xitoy tilini o‘rganish samaradorligiga ta’siri statistik jihatdan tahlil qilindi. Olingan natijalar mobil platformalar yordamida tashkil etilgan mustaqil ta’lim jarayoni talabalar motivatsiyasini oshirish, lingvistik kompetensiyalarni rivojlantirish va kommunikativ malakalarni mustahkamlashga xizmat qilishini tasdiqlaydi.