Zamonaviy o‘zbek adabiyotida o‘ziga xos poetik tafakkur va yangicha shakliy izlanishlari bilan ajralib turadigan shoira Farida Afro‘z ijodi ko‘plab adabiyotshunoslar e’tiborini tortib kelmoqda. Uning “tasbeh” deb ataluvchi uchliklari nafaqat shakliy jihatdan, balki mazmun-mohiyati bilan ham milliy she’riyatda yangi badiiy hodisa sifatida baholanadi. Tasbehlar qisqa hajmda katta falsafiy ma’noni ifodalashi, ramziy obrazlarga boyligi hamda inson ruhiyatining nozik qatlamlarini ochib berishi bilan ahamiyatlidir. Ushbu maqolada tasbehlarning o‘ziga xos jihatlari, tasbehlarning mavzu mundarijasi haqida atroflicha fikr yuritiladi.